ஊட்டமேற்றிய தொழு உரம் தயாரிப்பு முறை

ஒரு ஏக்கருக்கு தேவையான பொருட்கள்

நன்கு மக்கிய எரு - 600 கிலோ 
சூப்பர் பாஸ்பேட் - 100 கிலோ
வேப்பம் புண்ணாக்கு - 10 கிலோ

சூடாமோனஸ், டிரைக்கோடெர்மா விரிடி, அசோஸ்பைரில்லம், பெசிலியோமைசிஸ், வேம், பாஸ்போபாக்டீரியா போன்றவற்றில் ஒவ்வொன்றிலும் தலா ஒரு கிலோ.

செய்முறை

மக்கிய எருவுடன் சூப்பர் பாஸ்பேட் உரத்தை நன்கு கலந்து, பிறகு வேப்பம் புண்ணாக்கு மற்றும் உயிர் உரங்கள் அனைத்தையும் ஒன்றாக கலந்து நன்கு கிளறி விட வேண்டும். அதில் சிறிது நீர் தெளித்து நிழலான பகுதியில் மூடாக்கு போட்டு வைக்க வேண்டும்.

(குறிப்பு: ஊட்டமேற்றிய தொழு உரத்தின் ஈரப்பதம் புட்டு பதத்தில் இருக்க வேண்டும்.) சுமார் 10 முதல் 30 தினங்களுக்குப் பிறகு இதனை பிரித்து பயிருக்கு பயன்படுத்தலாம்.

இவ்வாறு ஊட்டமேற்றிய தொழு உரத்தினால் பயிறுக்குத் தேவையான மணிச்சத்து மற்றும் உயிர் உரங்களின் சத்துக்கள் அனைத்தும் முழுமையாக கிடைக்கிறது.

மணிச்சத்து உள்ள உரங்களை சாதாரணமாக பயன்படுத்தும்போது அதில் உள்ள மணிச்சத்தானது 10% மட்டுமே பயிருக்கு கிடைக்கும். மீதம் உள்ள மணிச்சத்து மண்ணிலேயே வீணாக படிந்து விடும்.

ஆனால் ஊட்டமேற்றிய தொழு உரம் பயன்படுத்துவதால் சுமார் 80% சத்துக்கள் பயிருக்கு கிடைக்கிறது. அங்கக அமிலங்களோடு மணிச்சத்து சேரும்போது அதில் கரையாத நிலையிலுள்ள மணிச்சத்து பயிர்களுக்கு எளிதாக கிடைக்கிறது.

விதை நேர்த்திசெய்ய

விதை நேர்த்தி செய்வதற்கு விதையுடன் டிரைக்கோடெர்மாவிரிடி, அசோஸ்பைரில்லம், பாஸ்போபாக்டீரியா போன்ற உயிர் உரங்களை ஒரு கிலோ விதைக்கு 10முதல் 20 கிராமை ஆறிய வடிகஞ்சியுடன் கலந்து சிறிது நேரம் நிழலில் உலர்த்தி பின் விதைக்க வேண்டும். இவ்வாறு விதை நேர்த்தி செய்யப்பட்ட விதைகளின் முளைப்புத்திறன் 80% அதிகமாக இருப்பதோடு, நோய் தாக்காத தரமான நாற்றுகள் நமக்கு கிடைக்கும்.

உயிர் இடுபொருட்கள் வகைகள்:

அசோஸ்பைரில்லம்தழைச்சத்தை கொடுக்கும் உயிர் உரம்

பாஸ்போ பாக்டீரியா
மணிச்சத்தை கொடுக்கும் உயிர் உரம்

வேம்
நுண்ணூட்டச்சத்தை கொடுக்கும் உயிர்உரம்

டிரைக்கோடெர்மா விரிடி
உயிர் பூஞ்சானக்கொல்லி

சூடோமோனாஸ் புளோரசன்ஸ்
உயிர் பூஞ்சானக்கொல்லி

பெசிலியோமைசிஸ் லிலாசினஸ்
உயிர் நூற்புழுக்கொல்லி

பிவேரியா பேசியான
உயிர் பூச்சிகொல்லி

போன்ற இயற்கை உரம் மற்றும் ஊட்டமேற்றிய தொழுவுரங்களை பயன்படுத்தி செலவை குறைத்து அதிக மகசூல் எடுப்போம்